Хаттар:

Ассаламу Iалайкум! Сан цхьа хаттар дара хьоьга. Мархин баттахь тIехьийзачу йоIега вистхила мегаш дац олуш хезнера суна, цунах лаьцна яздийр дарий ахь суна, мега-те иза йа ца мега-те?

Жоп:

БисмиллахIиррохьманиррохьим.

АлхьамдулиллахI, вассолату вассаламу Iала росулиллахI!

Ва Iалайкум ассалам ва рохьматуллахIи ва баракатухI!

ТIехьийзачу йоIе вистхиларх лаьцна, иза маца мега, муха мега, маца ца мега вай дийцира хьалха кхузахь: «Яло ниййат долчу йоIе вистхиларан дозанаш».

Нагахь санна ахь хоьттуш долу вистхилар вай оцу хаттарна деллачу жоьпехь мегаш дерг делахь – мега, дацахь – ца мега.

ТIаккха, со тIехьийзаш ву бохуш а ца Iаш, со вистхуьлуш ву бохуш а ца Iаш, нагахь санна хьой и йоI билггал яло сацам бина велахь катоххе схьаялайе.

Нагахь санна хьо вайн дукхах болчу кегийрахоша лелош долу ловзарш  лелош велахь – и хьашт доцу ловзарш Iаддита, хьайн дахарна а, хьайн хьолана а тIехь дикка ойла йе, хьайна катоххе зуда а ялайе.

Ткъа хьуна мархин баттахь вистхила мегаш дац аьлла хезна дерг – и ловзарш лелочара шайн хьолах лаьцна олуш дерг хир ду, шаьш лелориг дика доций а хууш, иза лартIехь доций а хууш, Далла гергахь шаьш гIалат буй а хууш, мархин баттахь Далла Iеса хилар кхечу хенахьчул доккха дуй а хууш олуш хир ду иза.

Ткъа дика хуург сийлахь-веза волу АллахI ву!

Дала Ша реза волчу хIуманна тIехь аьтту бойла хьан а, кхиболчу массо кегийрахойн а!

01.08.2011 = ‏01‏.09‏.1432