Хаттар:

Ассаламу Iалайкум варохьматуллахIи вабаракатухIу! Цхьа хаттар дара сан, аьхь хетахьхьа а ца хаьттичи ца волу.
Масала, гIенаха тIуналла яьлчи и ламазца дерг муха ду теша, полностью лича веза, йа и бехкейолу меттиг дIайиличхьанне тоьаш дуй теша йа дац-те? Со ала гIертаг хIун ду: лийча ца луьйчуш иштта и цIано а йина ламаз да мега йа ца мега?!

Жоп:

БисмиллахI, алхьамдулиллахI, вассолату вассаламу Iала росулиллахI!

Ва Iалайкум ассалам ва рохьматуллахIи ва баракатухI!

Оьшург хаттар иэхье дац. И ца хууш, ца хоттуш Iаш берш а хир болу дела яздо вай хIокху кепара долу хеттарш а, жоьпаш а сайта тIехь, массарна а пайда хилийтархьама.

Нагахь санна «тIуналла ялар» бохучух лууш дерг оралла ялар делахь, лийча веза. Оралла (оьрсийн маттара: сперма) – шех бер кхоллалуш йолу тIуналла ю. Цуьнан кхо билгало ю: иза араялар тоттуш-кхуссуш санна хуьлу; иза арайолуш марзо хуьлу; цуьнан хьожа хьакхийначу бодах йогIу хьожу санна хуьлу. Нагахь санна оцу билгалонех цхьа билгало елахь – масала гIенаха тIуналла арайолучу хенахь марзо хилла хилар дагадагIахь, йа самаваьллачул тIаьхьа цуьнан иштта хьожа ягIахь – лийчар тIедужу. Ткъа оцу тIуналлийца оцу билгалонех цхьаъа билгало яцахь, тIаккха лийчар тIе ца дужу.

Нагахь санна араяьлла йолу тIуналла оралла а йоцуш, кхиниг елахь, тIаккха лийчар тIе ца дужу, муххале а бехкеметтиг йила а йилина, иза хица дIа а цIанйина, тIуналла кхетта йолу бедар хийца а хийцина ламаз дан мега. Бехке меттиг йила езаран бахьана а, тIуналла кхетта йолу бедар хийца езаран бахьана а – и тIуналла «нажас» (боьха) лоруш хилар ду.

Дика хуург сийлахь АллахI ву!

08.01.2010 - ‏1431‏-01‏-22